روايه فتاه سي-ئه السمعه _ بقلم عادل عبدالله
بعد يومين قولت لأمي: كنت عاوز اقولك حاجة يا امي بالنسبة للعروسة.
: خير يا حبيبي ؟
: ايناس علفكرة كان مكتوب كتابها قبل كده.
: بتقول ايه يا عز ؟؟؟ وليه كده يا بني !!!
: ليه ايه يا ماما ؟ وفيها ايه ؟
: ليه عاوز تتجوز واحدة كانت متجوزة قبلك ؟؟
: ده كتب كتاب بس يا امي.
: اكيد اللي كان كاتب كتابها اختلا بيها وهما مخطوبين.
: يا امي دي ايناس محترمة اوي.
: بقولك لأ يعني لأ، مادام انكتب كتابها يبقي اللي كان كاتب كتابها اختلا بيها وحصل بينهم حاجة.
: يا امي انا اقدر احاسبها من وقت ما اتخطبنا.
: يا ابني انت عبيط !!! ازاي تقول كده !!! لازم تبقي اول واحد بالنسبة لمراتك واول راجل عرفته في حياتها.
: وفيها ايه يا امي دي بنت حلال وكويسة و...
: لا يا حبيبي كله الا دي، لازم تتجوز بنت بنوت وتكون اول فرحتك وانت اول فرحتها يا حبيبي.
: ما هي بنت بنوت يا امي، والصراحة انا بحب ايناس وعاوزها.
: وانا بقولك دي بالذات مستحيل اوافق وحتي ابوك مستحيل يوافق.
: ولو قولتلك علشان خاطري يا امي ؟
: علشان خاطرك انا بقول كده وعلشان عاوزة مصلحتك.
: بعد اذنك يا ماما انا مش هتجوز غير ايناس.
قامت أمي وراحت لوالدي وقالتله !!! والدي غضب اوي وقالي: ليه كده يا عز ؟
: ليه ايه يا بابا ؟
: ليه يا حبيبي تتجوز واحدة كانت متجوزة قبلك ؟!!
: ده كتب كتاب بس يا بابا.
: ولو يا حبيبي، مينفعش، لازم تتجوز بنت تكون انت اول فرحتها وهي اول فرحتك، لو كنت اتجوزت قبل كده كنا ممكن نفكر انما انت عمرك نا اتجوزت ولا دخلت دنيا، يكون اول بختك كده !!!
: يابابا دي انسانة محترمة اوي وبنت حلال وبحبها اوي وهي كمان بتحبني.
: ااه، ما دام عرفت تحبك قبل ما تتخطبوا يبقي عملت ايه مع اللي كان كاتب عليها وقربوا يتجوزوا ؟!!!!
: يابابا هي انسانه محترمة ومؤدبة وعمرها ما غلطت وعموما انا ممكن احاسبها بس من وقت ما ارتبط بيها.
: مين يا بني اللي دخل في عقلك الافكار الغلط دي ؟؟!!
: هي دي الحقيقة وهو ده الصح.
: الصح يا بني اللي انا بقولك عليه، انا اكبر منك بكتير واعرف الدنيا اكتر منك وبكلمك لمصلحتك.
: لكن انا بحبها ومش هتجوز غيرها.
وانتهي الحوار مع والدي ووالدتي وهما مصممين علي رفض جوازي بايناس !!
